བུ་མོ་གཡང་འཛོམས་སྒྲོལ་མ།

–སུ་ལ་ཡང་རྒྱུས་མངའ་མེད་པའི་བུ་མོ་ཞིག།

སྲས་མོ་གཡང་འཛོམས་སྒྲོལ་མ་སྤྱི་ལོ་ 1950 ཟླ་ 1 ཚེས་ 11 ཉིན་རྒྱ་གར་དུ་འཁྲུངས་ཤིང་། དེ་ནས་ཟླ་ཤས་ལས་མ་སོང་བར་ཡབ་རྒྱལ་ལོ་དོན་གྲུབ་དང་ཡུམ་ཀྲུའུ་ཏན་གཉིས་དང་ལྷན་དུ་ཐའི་ཝན་དང་ཨ་རིར་བསྐྱོད་ཅིང་། དེ་ནས་ཕྱིར་རྒྱ་གར་དུ་ཕེབས།

ཡབ་ཆེན་བོད་ཀྱི་དོན་དུ་ས་གནས་གཞན་དུ་འགྲུལ་བཞུད་ཡང་ཡང་གནང་དགོས་པར་བརྟེན་ཆུང་བའི་དུས་ནས་ཡབ་དང་ལྷན་དུ་བཞུགས་པའི་གོ་སྐབས་དེ་ཙམ་བྱུང་མེད།

གཡང་འཛོམས་སྒྲོལ་མ་རྒྱ་གར་ནས་མཐོ་སློབ་ཐོན་རྗེས་དབྱིན་ལན་དུ་སློབ་གྲྭར་བསྐྱོད། དེ་ནས་སློབ་མཐར་ཕྱིན་པ་ན་ཕྱིར་རྒྱ་གར་དུ་ཕེབས་ཏེ་ཡབ་ཀྱི་བཀའ་དགོངས་ལྟར་རྡ་རམ་ས་ལའི་གངས་སྐྱིད་དུ་ཕེབས། རྡ་སར་བཞུགས་རིང་བོད་ཀྱི་དཔེ་མཛོད་ཁང་དུ་ the Tibet Journal ཞེས་པའི་ཆེད་དེབ་ཀྱི་རྩོམ་སྒྲིག་པའི་ཕྱག་ལས་གནང་།

སྟབས་མི་ལེགས་པ་ཞིག་ལ། གཡང་འཛོམས་སྒྲོལ་མ་ཨ་ཧྥེ་རི་ཀའི་ལུང་པ་ཏུ་ནེ་ཤི་ཡ་(Tunisia)ཞེས་པར་ཕེབས་སྐབས་རླངས་འཁོར་བརྡབ་སྐྱོན་གྱིས་སྐུ་སྲོག་ཤོར། དེ་ལྟར་སྤྱང་གྲུང་ལྡན་པའི་བུ་མོ་གཡང་འཛོམས་སྒྲོལ་མ་སྤྱི་ལོ་ 1983 ཟླ་ 2 ཚེས་ 8 ཉིན་འཇིག་རྟེན་འདི་དང་ཞལ་གྱེས།

སྟག་མཚེར་སྲས་མོ་གཡང་འཛོམས་སྒྲོལ་མ་དང་ཚ་རོང་སྲས་འཇིགས་མེད་གཉིས་གཉེན་སྒྲིག་གནང་སྟེ་སྲས་གཅིག་འཁྲུངས། མཚན་ལ་མཐུ་སྟོབས་ཟེར། གཡང་འཛོམས་སྒྲོལ་མ་སྐུ་གཤེགས་རྗེས་ཡུམ་ཀྲུའུ་ཏན་གྱིས་རང་གི་ཚ་བོ་མཐུ་སྟོབས་བུ་ལྟར་བདག་སྐྱོང་གནང་། རྗེས་སུ་མཐུ་སྟོབས་ལགས་ཨ་རིར་ཕེབས་ཏེ་ད་དུང་དེ་གར་བཞུགས་ཡོད།

མདོར་ན། སྲས་མོ་གཡང་འཛོམས་སྒྲོལ་མའི་སྐུ་དྲིན་ལས་རྒྱལ་ཡུམ་ཆེན་མོའི་སྐུ་ཚེའི་ལོ་རྒྱུས་ཀྱི་དཔེ་དེབ་ཆུང་ཆུང་འདི་བྱུང་ཞིང་། དེ་ལ་བརྟེན་ནས་ཉེ་རབས་བོད་ཀྱི་ལོ་རྒྱུས་ཁྲོད་ཀྱི་གནས་ཚུལ་གང་མང་ཞིག་འུ་ཅག་གིས་ཤེས་རྟོགས་བྱུང་བ་ཡིན་ནོ།།