བདེ་མོ་བྱོས།

གཅན་མེ་སྟག། -ཐུག་མ་མྱོང་བ་ཞིག་ལ་འཁྲེང་ཞིང་དུང་བ་ནི་ཤེས་རིག་གི་བརྩེ་དུང་ཡིན་པ་འདྲ།

གཏམ་ངན་དེ་རྣ་བར་ལྷུང་བ་དང་བསྡོངས་ཏེ་ཚིག་ངན་ཞིག་མིག་ལམ་དུ་ཤར་བ་ན།

དུས་རྒྱུན་གློག་ཀླད་ཀྱི་ངོས་སུ་མགྱོགས་མྱུར་གྱིས་འཁྱུག་པའི་ཡིག་རིས་རྣམས་གློ་བུར་དུ་འཁྱོར་བྱུང་།

མིག་རས་གཉིས་ཀྱིས་ཅི་ཡང་མ་མཐོང་།

མདུན་གྱི་གློག་ཀླད་ཀྱང་འདར་བྱུང་།

ཨ་ཁ་ཅི་ཞིག་བྱུང་བ་ཡིན་ནམ།

འགྲོ་སྔ་དྲགས་སོང་།

འདུ་མ་མྱོང་ཡང་། འབྲལ་བ་ཆོས་ཉིད་ཡིན།

འདྲིས་མ་མྱོང་ཡང་། འཁྲེང་བ་བརྩེ་དུང་ཡིན།

ཤེས་རིག་གི་སྐྱེས་བུ་རེ་རེས་གྱེས་ཕྱག་འཚལ་ཏེ་ཕྱིན་པ་ན།

རྒྱང་རིང་གི་གྲོང་མཐའ་འདི་ནས་འགྱོད་གདུང་ལྟ་བུས་སུན་གཙེར་བྱིན་པ་ནི་ལན་གཅིག་མིན།

གང་ལྟར། བཟོད་པ་སྒོམ་རྒྱུ་ལས་ཅང་ལྷག་མ་སོང་།

གཅན་མེ་སྟག་ལགས། ག་ལེར་ཆས་ཤིག། ཤེས་རིག་ལ་དུང་བ་ཚོས་ཁྱོད་དྲན་ཞིང་ཁྱོད་མི་བརྗེད།

ཕོ་བྲང་ཆེན་པོའི་ཉེ་འདབས་ནས་ཁྱོད་ལ་སྐྱེལ་མ་བྱེད། བདེ་མོ་བྱོས། སང་ཉིན་གྱི་ཉི་མ་གཞོན་ནུར་སྒུགས་ཤིག། གཅན་མེ་སྟག་ལགས།

གཤམ་གྱི་རྩོམ་ཡིག་འདི་ཀློག་རོགས།

འདི་ལྟར་ཤི་སོང་ན།

གཅན་མེ་སྟག་གིས་བརྩམས།

ང་འདི་ལྟར་ཤི་སོང་ན

གསལ་བྱེད་སུམ་ཅུ་བོ་ཇི་ལྟར་བྱ

བཀྲུས་བཀྲུས་ནས་ཁ་དོག་ཀྱང་ཡལ་བའི

བརྡ་སྤྲོད་ཀྱི་ལྭ་བ་འདི་དག་ཇི་ལྟར་བྱ

སྤོས་ཀྱིས་གདུག་ཀྱང་ཆང་གིས་མཆོད་པའི

མཆོད་སྒྲོམ་གྱི་དབྱངས་ཡིག་བཞི་བོ་ཇི་ལྟར་བྱ

འདང་བརྩེ་ཡི་དབང་གིས

ངའི་ཆེད་དུ་རང་སྲོག་བློས་བཏང་བའི

སྙན་ངག་གི་དཔེ་དང་གཟུགས་རྒྱན

རབ་བཏགས་དང་བསྡུས་བརྗོད་འདི་དག་ཇི་ལྟར་བྱ

ང་འདི་ལྟར་ཤི་སོང་ན

ངའི་ལུས་ལ་མེ་ཏོག་དང་དྲི་ངད་གཏོར་བའི

མངོན་བརྗོད་དང་བརྡ་དག་ཚོགས་ཀྱིས་ཅི་ཞིག་བྱ

ང་འདི་ལྟར་ཤི་སོང་ན

ངའི་མིག་དང་སེམས་ལ་འབྱར་བའི

བོད་ཀྱི་ཡི་གེ་འདི་དག

དྭ་ཕྲུག་ཏུ་འགྱུར་ངེས

ཡུན་རིང་གི་ལོ་ཟླའི་ནང

ང་དང་གྲིབ་་མ་ལྟར་འགྲོགས་པའི

ཚེག་དང་ཤད་འདི་དག

སྐྱོ་གདུང་གིས་ཤི་ངེས

ད་ཅི་བྱེད་དམ

ང་ནི་ཤི་རན་སོང

མྱུར་བ་མྱུར་བར་མ་ཤི་ན

ངས་བྲིས་ཤིང་འབྲི་འགྱུར་གྱི

སྙན་ངག་འདི་དག་ཀྱང

དུས་རབས་ཀྱིས་བསྣུབས་ཤིང

མི་རྟག་པས་ཟོས་ཏེ

མི་རབས་ཕྱི་མར་སླེབས་དུས

ལྷག་བསམ་འདིའི་རུས་པ་སྤར་མོ་གང་ཡང

ལྷག་རྒྱུ་མ་རེད།